Վատ ընկերը
Աթաբեկ Խնկոյան
Մի անգամ
Առյուծ արքան
Մռնչում էր կողի ցավից.
Գազանները ամեն կողմից
Եկան հիվանդ արքային տեսնելու,
Բայց մեջներին չկար աղվեսը:
Էնտեղ մեկ էլ
Մի պառավ գել
Ասավ. – Արքա,
Ախր ի՞նչ կա,
Որ աղվեսը`
Հաճուճ-մաճուճ
Թիզ ու կեսը,
Քեզ չի հարգել,
Տես, չի եկել:
Ցավը թողած`
Արքան գոռաց,
Թե` հա թռեք,
Էն ըմբոստին
Մոտս բերեք:
Հինգ, վեց
Գազան
Ելան հասան,
Էն աղվեսին
Մի կերպ գտան,
Պատճառն ասին,
Բերին ատյան:
Արքան գոռաց.
— Ո՞ւր ես, մեռած…
— Ասեմ ձեռաց,
— Աղվեսն ասաց.
— Տեր վեհափառ,
Խնդիրս առ,
Որ լսեցի` դու հիվանդ ես,
Էլ ինչ ասեմ, ինձ հո գիտես,
Ինչպես գլխիս կրակ վառած
Եվ պատանս էլ թևիս առած
Հա էստեղ,
Հա էնտեղ,
Վերջը գտա
Ցավիդ դեղը,
Գելի մորթին արա մուշտակ,
Միսը` շորվա, խմի տաք-տաք,
Քրտնեց կողդ,
Կանցնի դողդ:
Որ չտվեց էսպես թելին,
Իսկույն գետին դրին գելին:
Արքան հագավ գելի կաշին,
Միսը կերավ նախաճաշին:
Քրտնեց կողը,
Անցավ դողը
Մեջտեղ գնաց
Զրպարտողը:
Հարցեր և առաջադրանքներ:
- Դո՛ւրս գրիր քեզ անծանոթ բառերն ու բառարանի օգնությամբ բացատրի՛ր:
Թիզուկեսը-կոլոտ,կարճահասակ,
ըմբոստ- հանդուգն, հակառակող, չլսող, անհնազանդ
ատյան — դատարան, ժողով
ձեռաց-անմիջապես
վեհափառ-բարձր և փառավոր, հզոր, շքեղ
պատան-փաթաթան, Մեռելը՝ դիակը փաթաթելու սպիտակ սավան
շորվա — Մսով կամ յուղով (ձեթով) ու բրնձով (ձավարով) ապուր
զրպարտել — Մեկի վրա սուտ մեղադրանքներ բարդել - Ինչպիսի՞ն էր ստեղծագործության աղվեսը:
խորամանկ, խելացի, հնարամիտ - Ինչպիսի՞ն էր ստեղծագործության գայլը:
չար, անխելք, սուտասան, զրպարտող - Ստեղծագործությունից դուրս գրի՛ր 3-ական միավանկ և երկվանկ բառ:
գել, դեղ, կող։
աղվես, առյուծ, արքա։ - Տրված բառերի հականիշները գրի՛ր.
Վախկոտ —խիզախ
Մեղավոր —անմեղ
Հիվանդ —առողջ
Ուժեղ –թույլ
Պառավ –երիտասարդ - Շարունակի՛ր ըստ օրինակի.
Օրինակ՝ ցավ-ցավել
Հիվանդ –հիվանդանալ
Դող –դողալ
Նախաճաշ –նախաճաշել
Քրտինք –քրտնել
Հագուստ –հագնել